ಸುತ್ತಲೂ ಹಸಿರು. ಕಾನನದಂಥ ವಾತಾವರಣ. ಮರದ ಮೇಲೊಂದು ಮನೆ! - ಇಂಥ ವಾತಾವರಣದಲ್ಲಿ ಕೆಲಸ ಮಾಡುವುದೆಂದರೆ ಯಾರು ಬೇಡ ಅನ್ನುತ್ತಾರೆ?! ತನ್ನ ಉದ್ಯೋಗಿಗಳನ್ನು ಖುಷಿ ಮತ್ತು ಕ್ರಿಯಾಶೀಲವಾಗಿ ಇಡಲು ಮೈಕ್ರೊಸಾಫ್ಟ್‌ ಕಂಪನಿಯು ವಾಷಿಂಗ್ಟನ್‌ನ ರೆಡ್‌ಮಂಡ್‌ ಕ್ಯಾಂಪಸ್‌ನಲ್ಲಿ ಇಂಥ ಕಚೇರಿಯೊಂದನ್ನು ರೂಪಿಸಿದೆ.

ಮೀಟಿಂಗ್‌ ತಾಣ, ದೈನಂದಿನ ಕೆಲಸಕ್ಕೆ ಸ್ಥಳಾವಕಾಶ ಸೇರಿದಂತೆ ಕಚೇರಿಯು ಉದ್ಯೋಗಿಸ್ನೇಹಿಯಾಗಿ ರೂಪುಗೊಂಡಿದೆ. ಹೊರಾಂಗಣದಲ್ಲಿ ಮೀಟಿಂಗ್‌ ತಾಣವಿದೆ. '''ಕೆಲವು ಕಂಪನಿಗಳು ಒಳಾಂಗಣದಲ್ಲಿ ಪರಿಸರ ಸ್ನೇಹಿ ವಾತಾವರಣವನ್ನು ರೂಪಿಸಿ ಉದ್ಯೋಗಿಗಳ ಖುಷಿಯನ್ನು ಹೆಚ್ಚಿಸಿವೆ. ಈ ಟ್ರೆಂಡನ್ನು ಹೊರಾಂಗಣಕ್ಕೂ ವಿಸ್ತರಿಸಲಾಗಿದೆ. ನಮ್ಮ ಕಂಪನಿಯು 500 ಎಕರೆ ಕ್ಯಾಂಪಸ್‌ನಲ್ಲಿ ಮರಗಳನ್ನು ಬಳಸಿಯೇ ಕಚೇರಿಯನ್ನು ವಿಶಿಷ್ಟವಾಗಿ ನಿರ್ಮಿಸಿದ್ದೇವೆ'' ಎಂದು ಕಂಪನಿ ಬ್ಲಾಗ್‌ನಲ್ಲಿ ಹೇಳಲಾಗಿದೆ.

ಮರದ ಗೋಡೆಗಳು, ಮರದ್ದೇ ಚಾವಣಿ, ಸೂರ್ಯನ ಬೆಳಕು ಹಿತವಾಗಿ ಬೀಳುವಂಥ ವಿನ್ಯಾಸ, ಹಸಿರಿನ ಬಳ್ಳಿ, ಚಿಗುರು ಇವೆಲ್ಲವೂ ಮುದ ನೀಡುವಂತಿವೆ. ಹೊರಾಂಗಣದಲ್ಲೂ ವೈ-ಫೈ ಸೌಲಭ್ಯವನ್ನು ಒದಗಿಸಲಾಗಿದೆ.