ಆಕೆ 36 ವರ್ಷದ ಮಹಿಳೆ. 17 ಮತ್ತು 14 ವರ್ಷದ ಇಬ್ಬರು ಹೆಣ್ಣುಮಕ್ಕಳ ತಾಯಿ. ಅಕ್ರಮ ಸಂಬಂಧವನ್ನಿಟ್ಟುಕೊಂಡವನ ಜತೆ ಮದುವೆಯಾಗಲು ಪತಿಯನ್ನಾಕೆ ಕೊಲ್ಲಿಸಿದ್ದಾಳೆ. ಸಿಸಿ ಟಿವಿ ದೃಶ್ಯಾವಳಿ ಸಹಾಯದಿಂದ ನಿಗೂಢ ಕೊಲೆ ರಹಸ್ಯವನ್ನು ಭೇದಿಸಿರುವ ಪೊಲೀಸರು ಆಕೆಯನ್ನೀಗ ಕಂಬಿಯ ಹಿಂದೆ ಅಟ್ಟಿದ್ದಾರೆ.

ಇದು ನಡೆದಿರುವುದು ಗುಜರಾತಿನಲ್ಲಿ. ಬುಧವಾರ ಸಂಜೆ ಸೋಲಾದ ಜಗತ್ಪುರ ಪ್ರದೇಶದಲ್ಲಿ ದಿಲೀಪ್ (40) ಎಂಬಾತನ ಶವ ಪತ್ತೆಯಾಗಿತ್ತು. ಆತನ ಕತ್ತು ಸೀಳಿ ಕೊಲೆಗೈಯ್ಯಲಾಗಿತ್ತು. ಈ ನಿಗೂಢ ಕೊಲೆಯ ಹಿಂದೆ ಬೆನ್ನತ್ತಿದ ಪೊಲೀಸರಿಗೆ ಆತನ ಪತ್ನಿ ಶಿಲ್ಪಾಳೇ ಈ ಕೊಲೆ ಮಾಡಿಸಿದ್ದಾಳೆಂದು ಪತ್ತೆಯಾಗಿದ್ದು, ಆಕೆಯ ಧೂರ್ತ ಬುದ್ಧಿಗೆ ಪೊಲೀಸರೇ ಬೇಸ್ತು ಬಿದ್ದಿದ್ದಾರೆ.

ನಡೆದಿದ್ದೇನು?

ಶಿಲ್ಪಾಳಿಗೆ ಬಾಪುನಗರದ ನಿವಾಸಿ ಗೋಪಾಲ್ ಗೋಹಿತ್ (40) ಎಂಬಾತನ ಜತೆ ಕಳೆದ ಎರಡು ವರ್ಷದಿಂದ ಅಕ್ರಮ ಸಂಬಂಧವಿತ್ತು. ನಿನ್ನನ್ನು ಮದುವೆಯಾಗುತ್ತೇನೆ ಪತಿ ದಿಲೀಪನನ್ನು ಕೊಲ್ಲೆಂದಾಕೆ ಆತನಿಗೆ ಹೇಳಿದ್ದಾಳೆ. ಆದರಾತ ನಿರಾಕರಿಸಿದ್ದಾನೆ. ಹೇಗಾದರೂ ಪತಿಯಿಂದ ಮುಕ್ತಿ ಪಡೆದುಕೊಳ್ಳಲೇ ಬೇಕೆಂದು ಬಯಸಿದ್ದ ಆಕೆ ತನ್ನ ಸಂಬಂಧಿ ಸಹೋದರಿಯ ಪತಿ ಹರೀಶನನ್ನು ಬುಟ್ಟಿಗೆ ಹಾಕಿಕೊಂಡು, ನೀನು ನನ್ನ ಪತಿಯನ್ನು ಕೊಂದರೆ ನಿನ್ನನ್ನು ಮದುವೆಯಾಗುತ್ತೇನೆ ಎಂದು ಆಮಿಷ ಒಡ್ಡಿದ್ದಾಳೆ.

ಆಕೆಯ ಮಾತಿಗೆ ಮರುಳಾದ ಆತ ಪಾರ್ಸಲ್ ಡೆಲಿವರಿ ಮಾಡಲಿಕ್ಕಿದೆ ಎಂದು ಹೇಳಿ ಶನಿವಾರ ದಿನ ನಗರದ ದಿಲೀಪನನ್ನು ಹೊರವಲಯಕ್ಕೆ ಕರೆಯಿಸಿದ್ದ. ಆದರೆ ಅಂದು ಆತನಿಗೆ ಕೊಲ್ಲುವ ಧೈರ್ಯ ಬರಲಿಲ್ಲ. ಜುಲೈ 31 ರಂದು ಅದೇ ಸ್ಥಳಕ್ಕೆ ಮತ್ತೆ ದಿಲೀಪನನ್ನು ಕರೆದ ಆತ ಕತ್ತು ಸೀಳಿ ಕೊಂದು ಹಾಕಿದ್ದಾನೆ.

ಸಿಸಿ ಕ್ಯಾಮರಾ ದೃಶ್ಯಾವಳಿಯ ಆಧಾರದ ಮೇಲೆ ಹರೀಶನನ್ನು ಬಂಧಿಸಿದಾಗ ಇದೆಲ್ಲ ಶಿಲ್ಪಾ ಆಡಿದ ಆಟವೆಂದು ಪೊಲೀಸರಿಗೆ ಗೊತ್ತಾಗಿದೆ.

ತನ್ನ ಅಕ್ರಮ ಸಂಬಂಧ ಕಾಯ್ದುಕೊಳ್ಳಲು ಮುಗ್ಧ ಪತಿಯನ್ನು ಕೊಂದ ಶಿಲ್ಪಾ ಮತ್ತು ಆಕೆಯ ಮೋಸದಾಟಕ್ಕೆ ಮರುಳಾಗಿ ಹತ್ಯೆ ಎಸಗಿದ ಹರೀಶ ಇಬ್ಬರು ಕೂಡ ಈಗ ಕಂಬಿ ಎಣಿಸುತ್ತಿದ್ದಾರೆ. ಆದರೆ ಶಿಲ್ಪಾಳ ತಪ್ಪಿನಿಂದಾಗಿ ಆಕೆಯ ಹದಿಹರೆಯದ ಹೆಣ್ಣುಮಕ್ಕಳು ಅನಾಥರಾಗುವಂತಾಗಿದೆ.