ಬರ್ಮಿಂಗ್‌ಹ್ಯಾಮ್: ಇಲ್ಲಿನ ಎಜ್‌ಬಾಸ್ಟನ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಆತಿಥೇಯ ಇಂಗ್ಲೆಂಡ್ ತಂಡವನ್ನು 287 ರನ್‌ಗಳಿಗೆ ಕಟ್ಟಿಹಾಕಿರುವ ಟೀಮ್ ಇಂಡಿಯಾ ಎರಡನೇ ದಿನದಾಟದಲ್ಲಿ ನಾಯಕ ವಿರಾಟ್ ಕೊಹ್ಲಿ ಸಮಯೋಚಿತ ಶತಕದ (149) ಹೊರತಾಗಿಯೂ 76 ಓವರ್‌ಗಳಲ್ಲಿ 274 ರನ್‌ಗಳಿಗೆ ಸರ್ವಪತನವನ್ನು ಕಂಡಿದೆ. ಈ ಮೂಲಕ ಮೊದಲ ಇನ್ನಿಂಗ್ಸ್‌ನಲ್ಲಿ 13 ರನ್‌ಗಳ ಅಲ್ಪ ಹಿನ್ನಡೆಗೊಳಗಾಗಿದೆ.

ಬಳಿಕ ದ್ವಿತೀಯ ಇನ್ನಿಂಗ್ಸ್ ಮುಂದುವರಿಸಿರುವ ಆಂಗ್ಲರ ಪಡೆ ಎರಡನೇ ದಿನದಂತ್ಯಕ್ಕೆ 3.4 ಓವರ್‌ಗಳಲ್ಲಿ ಒಂದು ವಿಕೆಟ್ ನಷ್ಟಕ್ಕೆ 9 ರನ್ ಗಳಿಸಿದೆ. ಈ ಮೂಲಕ ಒಟ್ಟು ಮುನ್ನಡೆಯನ್ನು22 ರನ್‌ಗಳಿಗೆ ಏರಿಸಿದೆ. ಮೊದಲ ಇನ್ನಿಂಗ್ಸ್‌ನ ಆಕ್ಷನ್ ರಿಪ್ಲೇ ಎಂಬ ರೀತಿಯಲ್ಲಿ ಆಲಿಸ್ಟಾರ್ ಕುಕ್ (0) ಅವರನ್ನು ಅಶ್ವಿನ್ ಮತ್ತೆ ಕ್ಲೀನ್ ಬೌಲ್ಡ್ ಮಾಡಿ ಗಮನ ಸೆಳೆದರು.

ಮೊದಲ ದಿನದಂತ್ಯಕ್ಕೆ 285/9 ಎಂಬಲ್ಲಿದ್ದ ಆತಿಥೇಯ ಇಂಗ್ಲೆಂಡ್ ತಂಡವು 287 ರನ್‌ಗಳಿಗೆ ಸರ್ವಪತನವನ್ನು ಕಂಡಿತು. ದಿನದ ಆರಂಭದಲ್ಲೇ ಸ್ಯಾಮ್ ಕರ್ರನ್ ಅವರನ್ನು (24) ಮೊಹಮ್ಮದ್ ಶಮಿ ಪೆವಿಲಿಯನ್‌ಗೆ ಅಟ್ಟಿದರು.

ಬಳಿಕ ಬ್ಯಾಟಿಂಗ್ ನಡೆಸಿದ ಭಾರತ ತಂಡವು ಉತ್ತಮ ಆರಂಭವನ್ನು ಪಡೆದರೂ ಸತತ ಮೂರು ವಿಕೆಟ್‌ಗಳನ್ನು ಕಳೆದುಕೊಳ್ಳುವ ಮೂಲಕ ಹಿನ್ನಡೆಗೊಳಗಾಯಿತು.

ಆರಂಭಿಕರಾದ ಮುರಳಿ ವಿಜಯ್ (20) ಹಾಗೂ ಶಿಖರ್ ಧವನ್ (26) ಮೊದಲ ವಿಕೆಟ್‌ಗೆ 50 ರನ್ ಪೇರಿಸಿದರು. ಈ ಹಂತದಲ್ಲಿ ದಾಳಿಗಿಳಿದ ಸ್ಯಾಮ್ ಕರ್ರನ್ ಓಪನರ್‌ಗಳ ಜತೆಗೆ ಕೆಎಲ್ ರಾಹುಲ್ (4) ಪೆವಿಲಿಯನ್‌ಗೆ ಅಟ್ಟುವ ಮೂಲಕ ತ್ರಿಬಲ್ ಆಘಾತ ನೀಡಿದರು.

ಚೇತೇಶ್ವರ ಪೂಜಾರ ಜಾಗದಲ್ಲಿ ಆಯ್ಕೆಗೊಂಡು ಮೂರನೇ ಕ್ರಮಾಂಕದಲ್ಲಿ ಕ್ರೀಸಿಗಿಳಿದಿದ್ದ ರಾಹುಲ್ ಮೊದಲ ಎಸೆತದಲ್ಲೇ ಬೌಂಡರಿ ಸಿಡಿಸಿದರೂ ಎರಡನೇ ಎಸೆತದಲ್ಲಿ ಕ್ಲೀನ್ ಬೌಲ್ಡ್ ಆಗುವ ಮೂಲಕ ನಿರಾಸೆ ಮೂಡಿಸಿದರು.

ಊಟದ ವಿರಾಮದ ಹೊತ್ತಿಗೆ 21 ಓವರ್‌ಗಳಲ್ಲಿ ಮೂರು ವಿಕೆಟ್ ನಷ್ಟಕ್ಕೆ 76 ರನ್ ಗಳಿಸಿತ್ತು. ಇದಾದ ಬಳಿಕವೂ ಭಾರತದ ಪರಿಸ್ಥಿತಿ ಭಿನ್ನವಾಗಿರಲಿಲ್ಲ.

ಅಜಿಂಕ್ಯ ರಹಾನೆ (15) ಹಾಗೂ ದಿನೇಶ್ ಕಾರ್ತಿಕ್ (0) ಹೊರದಬ್ಬಿದ ಬೆನ್ ಸ್ಟೋಕ್ಸ್ ಡಬಲ್ ಆಘಾತವನ್ನು ನೀಡಿದರು. ಇದರೊಂದಿಗೆ 100 ರನ್ ಗಳಿಸುವುದರೆಡೆಗೆ ಪ್ರಮುಖ ಐದು ವಿಕೆಟುಗಳನ್ನು ಕಳೆದುಕೊಂಡು ಭಾರಿ ಸಂಕಷ್ಟಕ್ಕೆ ಸಿಲುಕಿತು.

ಅತ್ತ ತಮಗೆ ಲಭಿಸಿದ ಜೀವದಾನದ ಪರಿಪೂರ್ಣ ಲಾಭವೆತ್ತಿದ್ದ ನಾಯಕ ವಿರಾಟ್ ಕೊಹ್ಲಿ ನಿಧಾನವಾಗಿ ತಂಡವನ್ನು ಮುನ್ನಡೆಸಿದರು. ಅಲ್ಲದೆ ಹಾರ್ದಿಕ್ ಪಾಂಡ್ಯ (22) ಜತೆಗೆ ಆರನೇ ವಿಕೆಟ್‌ಗೆ 48 ರನ್‌ಗಳ ಅಮೂಲ್ಯ ಜತೆಯಾಟದಲ್ಲಿ ಭಾಗಿಯಾದರು.

ಆದರೆ ಮತ್ತೆ ಕಾಡಿದ ಕರ್ರನ್, ಪಾಂಡ್ಯ ಅವರನ್ನು ಎಲ್‌ಬಿಡಬ್ಲ್ಯು ಬಲೆಗೆ ಸಿಲುಕಿಸಿದರು. ಅತ್ತ ದಿಟ್ಟ ಹೋರಾಟ ಪ್ರದರ್ಶಿಸಿದ ನಾಯಕ ಕೊಹ್ಲಿ 100 ಎಸೆತಗಳಲ್ಲಿ ಅರ್ಧಶತಕ ಬಾರಿಸಿದರು.

ಟೀ ವಿರಾಮದ ಹೊತ್ತಿಗೆ ಭಾರತ 48 ಓವರ್‌ಗಳಲ್ಲಿ ಆರು ವಿಕೆಟ್ ನಷ್ಟಕ್ಕೆ 160 ರನ್ ಗಳಿಸಿತ್ತು. ಅತ್ತ ನಾಯಕ ವಿರಾಟ್ ಕೊಹ್ಲಿ ಏಕಾಂಕಿ ಹೋರಾಟವನ್ನು ಮುಂದುವರಿಸಿದರು. ಇನ್ನೊಂದೆಡೆ ರವಿಚಂದ್ರನ್ ಅಶ್ವಿನ್ (22), ಮೊಹಮ್ಮದ್ ಶಮಿ (2) ಹಾಗೂ ಇಶಾಂತ್ ಶರ್ಮಾ (5) ಅವರಿಂದಲೂ ಸೂಕ್ತ ಬೆಂಬಲ ಸಿಗದೇ ಹೋಯಿತು.

ಏತನ್ಮಧ್ಯೆ ತಾವ್ಯಾಕೆ ಕಿಂಗ್ ಕೊಹ್ಲಿ ಎಂಬುದನ್ನು ನಿರೂಪಿಸಿದ ಟೀಮ್ ಇಂಡಿಯಾ ನಾಯಕ ಅಮೋಘ ಶತಕ ಬಾರಿಸಿ ಟೀಕಾಕಾರರ ಬಾಯಿ ಮುಚ್ಚಿಸಿದರು. ಈ ಮೂಲಕ ಇಂಗ್ಲೆಂಡ್ ನೆಲದಲ್ಲಿ ಚೊಚ್ಚಲ ಹಾಗೂ ಟೆಸ್ಟ್ ಕ್ರಿಕೆಟ್‌ನಲ್ಲಿ 22ನೇ ಶತಕ ಸಾಧನೆ ಮಾಡಿದರು.

ಶತಕದ ಬಳಿಕ ಮತ್ತಷ್ಟು ಆಕ್ರಮಣಕಾರಿ ಇನ್ನಿಂಗ್ಸ ಕಟ್ಟಿದ ಕೊಹ್ಲಿ, ತಂಡವನ್ನು ಅಪಾಯದಿಂದ ಪಾರು ಮಾಡಿದರು. ಆದರೂ ಶತಕೋತ್ತರ ಶತಕಾರ್ಧಕ್ಕೆ ಕೇವಲ ಒಂದು ರನ್ ಕೊರತೆಯಲ್ಲಿ ವಿಕೆಟ್ ಒಪ್ಪಿಸಿ ನಿರಾಸೆ ಮೂಡಿಸಿದರು. ಇದರಿಂದಾಗಿ ಭಾರತ ಅಲ್ಪ ಹಿನ್ನಡೆ ಎದುರಿಸಬೇಕಾಯಿತು.

ಅಂತಿಮವಾಗಿ ಟೀಮ್ ಇಂಡಿಯಾ 76 ಓವರ್‌ಗಳಲ್ಲಿ 274 ರನ್‌ಗಳಿಗೆ ತನ್ನೆಲ್ಲ ವಿಕೆಟುಗಳನ್ನು ಕಳೆದುಕೊಂಡಿತು. ಅಷ್ಟೇ ಯಾಕೆ ಉಮೇಶ್ ಯಾದವ್ (1*) ಜತೆ ಕೊನೆಯ ವಿಕೆಟ್‌ಗೆ 57 ರನ್‌ಗಳ ಜತೆಯಾಟದಲ್ಲಿ ಭಾಗಿಯಾಗಿದ್ದರು.

ತಮ್ಮ ಮ್ಯಾರಥನ್ ಇನ್ನಿಂಗ್ಸ್‌ನಲ್ಲಿ 225 ಎಸೆತಗಳನ್ನು ಎದುರಿಸಿರುವ ಕೊಹ್ಲಿ 22 ಬೌಂಡರಿ ಹಾಗೂ ಒಂದು ಸಿಕ್ಸರ್ ನೆರವಿನಿಂದ 149 ರನ್ ಗಳಿಸಿದ್ದರು. ಇಂಗ್ಲೆಂಡ್ ಪರ ಸ್ಯಾಮ್ ಕರ್ರನ್ ನಾಲ್ಕು ಮತ್ತು ಜೇಮ್ಸ್ ಆಂಡೆರ್ಸನ್, ಆದಿಲ್ ರಶೀದ್ ಮತ್ತು ಬೆನ್ ಸ್ಟೋಕ್ಸ್ ತಲಾ ಎರಡು ವಿಕೆಟುಗಳನ್ನು ಕಿತ್ತು ಮಿಂಚಿದರು.

ಈ ಮುನ್ನ ಪ್ರಥಮ ದಿನದಲ್ಲಿ ಇಂಗ್ಲೆಂಡ್‌ಗೆ ನಾಯಕ ಜೋ ರೂಟ್ (80) ಹಾಗೂ ಜಾನಿ ಬೈರ್‌ಸ್ಟೋವ್ (70) ಆಸರೆಯಾಗಿದ್ದರೆ ನಾಲ್ಕು ವಿಕೆಟುಗಳನ್ನು ಕಬಳಿಸಿದ್ದ ಆರ್ ಅಶ್ವಿನ್ (60/4) ಹಾಗೂ ಮೊಹಮ್ಮದ್ ಶಮಿ (64/3) ಕಡಿವಾಣ ಹಾಕಿದ್ದರು.