ಬಾಲಿವುಡ್ ತಾರೆ ಸೋನಾಲಿ ಬೇಂದ್ರೆ ಮೆಟಸ್ಟ್ಯಾಟಿಸ್ ಕ್ಯಾನ್ಸರ್‌ನಿಂದ ಬಳಲುತ್ತಿರುವುದು ಗೊತ್ತೇ ಇದೆ. ಸಾಮಾಜಿಕ ಮಾಧ್ಯಮದಲ್ಲಿ ತನಗೆ ಕ್ಯಾನ್ಸರ್ ಇರುವುದಾಗಿ ತಿಳಿಸಿದಾಗ ಇಡೀ ಚಿತ್ರರಂಗ, ಅಭಿಮಾನಿಗಳು ಶಾಕ್‌ಗೆ ಒಳಗಾದರು. ಕ್ಯಾನ್ಸರ್ ಜತೆಗೆ ಹೆಜ್ಜೆ ಹೆಜ್ಜೆಗೂ ಹೋರಾಡಿ ಗೆಲ್ಲುತ್ತೇನೆ ಎಂಬ ಅವರ ವಿಶ್ವಾಸದ ಮಾತಿಗೆ ಸಾಕಷ್ಟು ಮಂದಿ ಸೆಲೆಬ್ರಿಟಿಗಳು ಇನ್ನಷ್ಟು ಆತ್ಮವಿಶ್ವಾಸ ತುಂಬಿದ್ದಾರೆ.

ಸದ್ಯಕ್ಕೆ ನ್ಯೂಯಾರ್ಕ್‌ನಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಅವರು ಆಗಿಂದಾಗ್ಗೆ ಇನ್‍ಸ್ಟಾಗ್ರಾಮ್ ಮೂಲಕ ತನ್ನ ಆರೋಗ್ಯ ಪರಿಸ್ಥಿತಿಯ ಮಾಹಿತಿಯನ್ನು ಹಂಚಿಕೊಳ್ಳುತ್ತಿದ್ದಾರೆ. ಕಿಮೋಥೆರಪಿ ಚಿಕಿತ್ಸೆ ಪಡೆದಿರುವ ಅವರು ತಮ್ಮ ತಲೆಗೂದಲನ್ನು ಶಾರ್ಟ್ ಮಾಡಿಕೊಂಡಿರುವ ಫೋಟೋವನ್ನು ಹಂಚಿಕೊಂಡಿದ್ದಾರೆ.

ಸೋನಾಲಿ ಬೇಂದ್ರೆಗೆ 12 ವರ್ಷದ ಮಗ ರಣವೀರ್ ಇದ್ದು, ಸದ್ಯಕ್ಕೆ ಬೇಸಿಗೆ ರಜೆಗಳ ನಿಮಿತ್ತ ಅಮ್ಮನ ಬಳಿಯೇ ಇದ್ದಾನೆ. ಸಾಮಾನ್ಯವಾಗಿ ಮಕ್ಕಳಿಗೆ ಈ ವಿಷಯ ತಿಳೀಸಬೇಕೆ ಬೇಡವೆ ಎಂಬ ಸಂದಿಗ್ಧತೆ ಎಲ್ಲಾ ತಂದೆತಾಯಿಯನ್ನು ಕಾಡುತ್ತದೆ. ತಾನೂ ಸಹ ಇಂತಹದ್ದೇ ಸಂದಿಗ್ಧ ಪರಿಸ್ಥಿತಿಗೆ ಒಳಗಾದೆ. ತನಗೆ ಕ್ಯಾನ್ಸರ್ ಇರುವುದನ್ನು ಹೇಳುವುದೇ ಸರಿ ಎನ್ನಿಸಿ ಮಗನಿಗೆ ತನ್ನ ಪರಿಸ್ಥಿತಿ, ಚಿಕಿತ್ಸೆ ಬಗ್ಗೆ ತಿಳಿಸಿದ್ದಾಗಿ ಸೋನಾಲಿ ಬೇಂದ್ರೆ ಹೇಳಿದ್ದಾರೆ.

ಈ ಬಗ್ಗೆ ಇನ್‍ಸ್ಟಾಗ್ರಾಮ್‍ನಲ್ಲೂ ವಿಶದವಾಗಿ ಬರೆದುಕೊಂಡಿರುವ ಅವರು, "ಮಗನೊಂದಿಗೆ ನಾವು ಯಾವಾಗಲೂ ಮುಕ್ತ ಮತ್ತು ಪ್ರಾಮಾಣಿಕರಾಗಿದ್ದೇವೆ. ಅವನಿಗೆ ಕ್ಯಾನ್ಸರ್ ಇರುವುದು ತಿಳಿಸಿದಾಗ ಅವನು ಅದನ್ನು ಪ್ರಬುದ್ಧವಾಗಿ ಸ್ವೀಕರಿಸಿದ. ಈಗ ಅವನೇ ನನಗೆ ಶಕ್ತಿ, ಸಕಾರಾತ್ಮಕತೆಯ ಮೂಲ. ಈಗ ಅವನೇ ನನಗೆ ಪೋಷಕರ ಸ್ಥಾನದಲ್ಲಿ ನಿಂತು ಸಹಾಯ ಮಾಡುತ್ತಿದ್ದಾನೆ"ಎಂದಿದ್ದಾರೆ.

ಇಂತಹ ಪರಿಸ್ಥಿತಿಯ ಬಗ್ಗೆ ಮಕ್ಕಳಿಗೆ ಕಡ್ಡಾಯವಾಗಿ ತಿಳಿಸುವುದು ನನ್ನ ಪ್ರಕಾರ ಸರಿ. ಇದರಿಂದ ನಮಗಿಂತ ಅವರು ಮಾನಸಿಕವಾಗಿ ದೃಢವಾಗಲು ಸಾಧ್ಯವಾಗುತ್ತದೆ. ಇಂತಹ ಸಂದರ್ಭಗಳಲ್ಲಿ ಮಕ್ಕಳನ್ನು ದೂರ ಇಡುವುದು ಸರಿಯಲ್ಲ, ಜೀವನ ಸತ್ಯಗಳು ಅವರಿಗೂ ಗೊತ್ತಾಗಬೇಕು. ಸದ್ಯಕ್ಕೆ ರಣವೀರ್ ಜತೆಗೆ ಸಮಯ ಕಳೆಯುತ್ತಿದ್ದೇನೆ. ಅವನ ಮುಗ್ಧತೆ ಮತ್ತು ತುಂಟಾಟವೇ ನನಗೆ ಸ್ಫೂರ್ತಿ. ಪ್ರತಿಯೊಬ್ಬರಿಂದಲೂ ಇದನ್ನೇ ಬಯಸುತ್ತೇನೆ ಎಂದಿದ್ದಾರೆ.